Витаминот Ц е витамин кој е растворлив во вода, се наоѓа во многу видови храна, особено во овошјето и зеленчукот. Тој е добро познат по тоа што е моќен антиоксиданс, како и дека има позитивни ефекти врз здравјето на кожата и функцијата на имунитетот. Исто така витаминот Ц е од витално значење за синтезата на колаген, сврзното ткиво, коските, забите и крвните садови.
Како производи во кои може да се најде најголема концентрација на витаминот Ц се препорачуваат следните:
Лимон
Лимонот е можеби најчесто конзумираното овошје кај нас и се поврзува со витаминот Ц. Од историски аспект лимони им биле дадени на морнарите во текот на 1700-тите за да спречат скорбут. Тоа претставува целосен недостаток на витамин Ц во организмот. Еден цел суров лимон, вклучувајќи ја и неговата кора, обезбедува 83 mg витамин Ц, или 92% од дневните потреби. Познато е дека Витаминот Ц во сокот од лимон делува и како антиоксиданс и го подобрува имунитетот.
Чили пиперки
Една зелена чили пиперка содржи 109 mg витамин Ц, или 121% од дневните потреби. За споредба, една црвена чили пиперка дава 65 mg, или 72% од дневните потреби.
Покрај тоа, чили-пиперките се богати со капсаицин, соединение кое е одговорно за нивниот лут вкус. Капсаицинот исто така позитивно делува на воспаленија и болки.
Постојат докази дека приближно една лажица (10 g) црвен чили во прав може да помогне во зголемување на согорувањето на маснотиите.
Киви
Просечно една овошка од киви содржи 71 mg од витаминот Ц, или 79% од дневните потреби. Студиите покажуваат дека киви овошје богато со витамин Ц може да помогне во намалување на стресот, намалување на холестеролот и подобрување на имунитетот.
Студија спроведена на луѓе на возраст од 20–51 година откри дека јадењето 2-3 киви секој ден во текот на 28 дена ја намалува лепливоста на тромбоцитите во крвта за 18% и ги намалува триглицеридите за 15%. Ова може да го намали ризикот од згрутчување на крвта и мозочен удар.
Брокула
Брокулата иако е зеленчук е доста богата со витаминот Ц. Половина чаша варена брокула обезбедува 51 mg витамин Ц, или 57% од дневните потреби.
Бројни студии укажуваат на можна поврзаност помеѓу јадење на зеленчук богат со витамин Ц и намален стрес, подобрен имунитет и намален ризик од карцином и срцеви заболувања.
Јагоди
Една чаша јагоди (152 g) обезбедува 89 mg од витаминот Ц, или 99% од дневните потреби. Јагодите содржат разновидна и моќна мешавина од витамин Ц, манган, флавоноиди, фолати и други корисни антиоксиданти.
Истражувањата покажуваат дека поради нивната висока содржина на антиоксиданти, јагодите можат да помогнат во спречување на рак, васкуларни заболувања, деменција и дијабетес.
Човечкото тело не може да произведува или складира витамин Ц. Затоа, неопходно е редовно да се консумира во доволни количини. Дневна препорачана количина на витамин Ц за возрасен човек е 90 mg. Најдобар ефект витаминот има врз здравјето на луѓето кога се конзумира природно преку овошје и зеленчук, купени од најблискиот маркет. Побрза варијанта да ја внесете потребната количина на овој витамин може да направите со подготовка на вкусен смути наутро. Сепак заради новиот начин на живеење, динамиката во секојдневието се потешко е да се внимава на исхраната, па затоа витаминот Ц многу често се зема во форма на суплементи. Симптомите на недостаток вклучуваат крварење на непцата, чести модринки и инфекции, слабо заздравување на раните, анемија и скорбут.
