Супернамирниците се храна која во себе има повисока концентрација на биоактивни материи кои се корисни за организмот. Најчесто тие супернамирници имаат високи дози на антиоксиданси, полифеноли, витамини и минерали. Тоа е многу важно, бидејќи со секојдневно користење на супернамирници, се подобрува имунитетот, се спречуваат хронични болести и се подобрува квалитетот на животот. Со текот на годините, истражувањата покажуваат дека здравиот начин на исхрана може да го намали ризикот од висок крвен притисок, срцеви заболувања, дијабетес и одредени видови на рак.
Во продолжение ви посочуваме листа од 10 супернамирници што секако ќе ви го зголемат нивото на енергија, но и здравјето генерално, доколку се храните умерено и редовно ги конзумирате.
Бобинки
Богати со растителни влакна, бобинките се природно слатки, а нивните богати бои значат дека содржат многу антиоксиданси и хранливи материи, кои се важни за борба против многу болести. Иако различните видови на бобинки ги немаме во природата преку целата година, треба да се знае дека исто толку е здраво да ги купите замрзнати. Додадете ги во јогурт, житарки, смути или јадете ги како обична закуска.
Риба
Рибата може да биде добар извор на протеини и омега-3 масни киселини, кои помагаат во спречување на срцеви заболувања. Купете свежа, замрзната или конзервирана риба. Рибите со најголема содржина на омега-3 се: лосос, стекови од туна, скуша, харинга, пастрмка, аншоа и сардини. Она што треба да го знаете дополнително за рибите е дека не се препорачува нивно секојдневно конзумирање.
Лиснат зеленчук
Темен, лиснат зеленчук е добар извор на витамин А, витамин Ц и калциум, како и неколку фитохемикалии (хемикалии направени од растенија кои позитивно влијаат на вашето здравје). Тие исто така додаваат влакна во исхраната. Оние кои лесно можат да се најдат кај нас се: спанаќ, блитва и марулата. Најдобро е да се конзумираат во салати, но може и да бидат приготвени со пржење во малку маслиново масло. Исто така можат да се користат како додатоци во зеленчукова супа или чорба.
Зрнести плодови
Ореви, лешници, индиски ореви и бадеми. Сите овие плодови се добар извор на растителни протеини. Тие исто така содржат незаситени масти, што може да биде фактор за намалување на ризикот од срцеви заболувања. Најдобро е да се конзумираат наутро. Може да се додадат на овесни снегулки или јогурт или да се конзумираат самостојно како закуска. Сепак треба да се знае дека се доста калорични, па ограничувањето би требало да се сведе на еден грст дневно од оваа храна.
Маслиново масло
Маслиновото масло е добар извор на витамин Е, полифеноли и незаситени масни киселини, кои најмногу помагаат да се намали ризикот од срцеви заболувања.
Користете го наместо путер или маргарин во јадења со тестенини или ориз. Дополнително нека бидат незаменлива состојка во секоја ваша салата.
Цели житни зрна
Интегралните житарки се добар извор на растителни влакна, но исто така содржат неколку витамини од групата Б, минерали и фитонутриенти. Докажано е дека го намалуваат холестеролот и штитат од срцеви заболувања и дијабетес. Обидете се да појадувате чинија овесна каша. Кога купувате леб во супермаркет, погледнете дали содржи цели зрна.
Јогурт
Добар извор на калциум и протеини, јогуртот содржи и живи култури наречени пробиотици. Овие „добри бактерии“ можат да го заштитат организмот од други, поштетни бактерии. Обидете се да пиете повеќе јогурт. Купете обичен јогурт и додадете суво или свежо овошје.
Коренест зеленчук
Тука спаѓаат: ротквица, цвекло, трупка. Тие се одличен извор на влакна, витамини и фитохемикалии, и се препорачуваат против некои видови на рак. Најдобро е да се конзумираат сирови или како дел од некоја салата.
Мешункасти плодови
Оваа широка категорија вклучува грав, грашок, леќа. Мешунките се одличен извор на влакна, фолати и растителни протеини. Студиите покажуваат дека тие можат да помогнат да се намали ризикот од срцеви заболувања. Додадете ги во салати или зелечукови чорби.
Домати
Исклучително богати со витамин Ц и ликопен, што се покажува дека го намалуваат ризикот од рак на простата. Пробајте домати во салата или како сос од домати во комбинација со тестенини. Можете исто така да ги ставите во чорби или супи.
Овие 10 супернамирници се богати со хранливи компоненти, витамини и минерали, истовремено не содржат многу калории, а ја даваат неопходната енергија. Доколку конзумирате повеќе од нив, а помалку преработената храна, ќе живеете поквалитетно, ќе имате подобра линија, но и повисоко ниво на енергија во текот на целиот ден.
