Кога готвиме подолго време, градиме сопствена рутина и начин на готвење. Тоа ги вклучува и состојките што ги употребуваме при готвење и затоа треба да избереме соодветно. Постојат разни видови на масла за готвење со различна намена и употреба.
Има масла што додаваат вкус на храната, додека пак други се со неутрален вкус. Од маслата едни се користат за пржење, други за печење, некои како преливи и слично. Во маркет може да најдете неколку, вклучувајќи рафинирани и растителни масла и според тоа, добро е да знаете кои се масла за готвење.
Кои се растителни масла за готвење?
Експертите советуваат да ги избегнувате рафинираните масла за готвење кои може да содржат хемиски конзерванси или не се соодветни за готвење на висока температура. За разлика од нив, растителните масла се изработени од природни состојки, содржат незаситени масти. Тие се “добри” масти кои позитивно влијаат врз организмот, а како такви се издвојуваат следниве:
Маслиново масло
Она што треба да го знаете за маслиновото масло е тоа дека е 100% здраво за готвење. Многу од луѓето мислат дека лесно гори и дека е карциногено. Но, маслиновото масло почнува да гори на температура поголема од 220°C. Ако тоа се случи, само намалете ја температурата. Обичното маслиново масло, за разлика од екстра вирџин е мешавина од процесирани и непроцесирани масла и затоа повеќе се користи за готвење.
Екстра вирџин маслиново масло
Екстра вирџин маслиновото масло содржи непроцесирани масла. Поретко се употребува за готвење, но може да се користи за пржење или како дресинг во салата со свеж зеленчук. Кога го користите за готвење, внимавајте да не биде на висока температура поголема од 160°C, затоа што може да загори и да се уништат антиоксидансите. Колку повеќе содржи масни киселини, помала е веројатноста да загори.
Кокосово масло
Кокосовото масло не треба да го избегнувате кога готвите затоа што содржи уникатни компоненти кои ги засладуваат оброците. Поради слаткиот вкус често се употребува во десертите како замена за млечни производи, додека пак во солените може да се користи како замена за путер. Се користи за готвење на средна температура (околу 160°C), а треба да се чува на собна температура.
Растителни масла од семиња
Постојат повеќе видови на масла од семиња. Тука спаѓаат маслото од лен, сусамовото масло, масло од семки од тиква, како и чиа маслото. Се користат затоа што имаат богат нутритивен состав и здравствени придобивки, но не се користат за секојдневно готвење. Притоа, може да ги употребите ако сакате да испробате некој нов вкус, а најчесто се користат во салати, преливи и слично.
Сончогледово масло
Сончогледовото масло има висок квалитет и често се употребува кај нас за готвење и за пржење на температура од 120°C – 180°C. Кога купувате сончогледово масло, обрнете внимание на составот – ладно цедените растителни масла содржат незаситени масни киселини и може да се употребуваат во здрава исхрана, во салати и слично. Пробајте да ги избирате оние масла за готвење што не содржат хемиски конзерванси.
Совети при употреба:
- Избирајте масла за готвење во стаклени шишенца, не пластични
- Ако стоело подолг период не го употребувајте, може да оксидира
- Чувајте ги на ладни и темни места
- Премачкајте ја тавата за да не се залепи храната
- Искористете ги како замена за путер, маргарин или цврста маст
- Не го употребувајте еднаш искористеното масло од тавата по втор пат
Заклучок
Кога готвите, добро е да ја знаете потребата од квалитетни масла за готвење, како и нивната намена во кујната. Кога ја знаете разликата меѓу нив, имате повеќе опции за да зготвите здрав оброк кој нема да ви загори и ќе биде со побогат вкус и арома. И најважното – оброк во кој ќе ужива целото семејство.
