Децата преку својата игра и во секојдневните активности се во постојан контакт со бактерии, вируси и најразлични материи, кои можат негативно да делуваат на нивното здравје и на имунитетот. Дополнително се изложени на загадувањето, особено во поголемите градови, што значително го влошува имунитетот. За да се справат и да останат во добро здравје, од најголемо значење е нивната способност да се одбранат од овие штетни влијанија. Механизмот кој е задолжен да ја извршува оваа задача е имунолошкиот систем. Основа на имунолошката реакција е да го препознае „непријателот” и да го неутрализира/отстрани од организмот. Сепак, сите деца немаат иста реакција и подеднаква заштита од надворешните микро непријатели.
Познато е дека почетокот на секоја школска година е период кој што знае да биде доста стресен за сите ученици, посебно кај помалите бидејќи претставува голема промена на дотогашното живеење и секојдневни активности. Логично е овој период да се преземат работи кои би придонеле до зголемување на имунитетот.
Како да го зајакнеме имунитетот?
Еден од начините за да се зајакне имунитетот е подобрување на исхраната, заради зголемување на количините на витамини и минерали кои придонесуваат за зголемување на имунитетот. Важни елементи во исхраната кои делуваат позитивно на имуниот систем се следните: цинк, железо, бакар, селен, витамини A, Б, Ц и E (се наоѓаат во овошјето, зеленчукот, интегралните житарици, ореви, бадеми, лешници, други јаткасти плодови и семиња). Олеснителна околност е што сите овие производи се достапни во секој поголем маркет.
Витамин Ц
Овој витамин делува на тој начин што ги стимулира клетките на одбрамбениот систем, го поткрепува и го зајакнува имунитетот и има антиоксидантни својства. Најчесто може да се внесува преку конзумирање на свежо овошје или зеленчук. За производите со најголема концентрација на витаминот Ц може да прочитате на следниот линк.
Прополис
Докажан природен пчелен производ кој има повеќекратно позитивно дејство на здравјето, а посебно на имуниот систем на човекот. Содржи голем број на лековити материи кои имаат антоксидативни, антимикробни, противвоспалителни и други лековити својства.
Алое вера
Се добива како дел од срцевината на тип на кактус со име Алое Вера. Доста е познат во медицината заради неговиот широк спектар на позитивни делувања врз здравјето. Се наоѓа во најразлична форма: гел, таблети, додаден во други производи заради засилување на нивните својства и слично. Содржи материи кои влијаат на имунитетот и материи што намалуваат најразлични воспаленија.
Мед
Познато е дека една лажица мед на ден, со вода или чај, го зајакнува имунитетот на организмот. Медот отсекогаш се користел како лек и има многу различни здравствени придобивки од неговата секојдневна употреба. Тој е убедливо еден од најздравите производи на природата, кои позитивно делуваат на здравјето на човекот. Препорака е секогаш кога имате потреба од засладувач, да користите мед. Повеќе за придобивките од медот, може да прочитате на следниот линк.
Рибино масло
Рибиното масло е на листата на додатоци кои треба да се консумираат секојдневно. Маслото го штити телото од токсините кои влегуваат во него од загадувањето на воздухот. Една лажичка рибино масло во текот на денот го прави имунолошкиот систем многу посилен и поотпорен.
Дополнителни препораки како може да се подобри имунитетот
Спиење
За децата е добро да имаат рутина, односно правило и време кога треба да си легнат.
Стрес
За секој проблем треба да се разговара и да се потенцираат решенија, а не комплексноста на проблемот.
Здрава исхрана
Потребно е да се јаде многу зеленчук, овошје, јаткасти плодови и семиња. Здравите навики се формираат уште од најмала возраст. Децата треба да ја знаат и препознаваат здравата храна.
Сонце
Децата треба да бидат активни и секогаш кога е можно да бидат на отворено, заради изложеноста на сонце и чист воздух.
Умерена физичка активност
Освен здрава храна, за здраво тело е потребно и физичка активност која треба да биде уште поголема кај децата за разлика од возрасните. Тоа подразбира често движење, играње и иницирање на најразлични вежби кај децата.
