За јаткастите плодови е познато дека се нутритивни и дека имаат позитивни влијанија врз човечкиот организам. Истите се богати со витамини и минерали, чија комбинација ги прави одлични во оброк или ужина. Можете да ги најдете во маркет или семкарница.
Крцкави се и вкусни, а доволен е еден грст јаткасти плодови на ден за да се чувствувате поенергично и поздраво. Иако имаат различни придобивки за организмот, имаат една заедничка функција – го подобруваат здравјето на срцето.
За што помагаат јаткастите плодови?
Јаткастите плодови содржат добри” масти, уште наречени омега 6 и омега 3 масни киселини кои му помагаат на организмот да извршува голем број функции. Овие супернамирници се ботанички суви семиња кои покрај добрите масти содржат и други хранливи материи неопходни за вашето здравје.
За јаткастите плодови се вели дека има иста функција со кафето, даваат енергија и може да бидат одлична замена за утринскиот пијалак. Покрај тоа, може да подготвите и протеински оброци за деца и возрасни, зошто богати се и со протеини.
Богати се со антиоксиданси
Антиоксидансите што ги има во јаткасти плодови го штитат вашето тело од оксидативниот стрес со тоа што ги неутрализираат нестабилните молекули кои може да ги оштетат мозочните клетки. Во чести случаи, стресот доведува до пад на имунитетот, при што антиоксидансите го штитат вашиот организам.
Ги намалуваат калориите
Според едно истражување, се докажало дека луѓето кои конзумирале јаткасти плодови го намалиле нивниот струк за 5 см на крајот од нивната диета. Честопати, луѓето вклучуваат маслиново масло во диетата зошто помага во слабеењето, но со јаткастите плодови може да добиете подобри резултати на крај од диетата.
Го подобруваат здравјето на срцето
Сите видови на јаткасти плодови го штитат срцето од заболувања и придонесуваат за неговото здравје. Ваквите супернамирници помагаат со тоа што го намалуваат лошиот холестерол. Додека пак, масните киселини и влакната што ги содржат во нив, го штитат срцето.
Го штитат мозокот
Една од добрите придобивки од конзумирање на јаткасти плодови е за здрав мозок. Знаете дека со текот на стареењето помнењето се намалува, а овие намирници го спречуваат тоа. Некои од нив, помагаат повеќе дури и од најздравите видови на зеленчук и овошје.
Кои намирници спаѓаат во јаткасти плодови?
Постојат повеќе видови на јаткасти плодови од кои ќе ги наброиме оние кои се најздрави и ги има кај нас. Меѓу нив се следниве:
- Ореви
- Бадеми
- Ф’стаци
- Бразилски Ореви
- Лешници
- Индиски Ореви
Ореви
Оревите се доста познати по тоа што ја подобруваат функцијата на мозокот и меморијата со што штитат од Алцхајмерова болест, а помагаат и полесно да заспиете. Покрај тоа што се здрави за мозокот, оревите помагаат против рак на дојка, го намалуваат холестеролот и ги штитат крвните садови од мрсна храна.
Бадеми
Бадемите се доста познати крцкави апетисани кои содржат калциум, минералот кој се грижи за здравјето на коските и витамин Е, кој е добар за кожата. Покрај тоа, богати се со магнезиум, како и флавоноиди кои го штитат срцето.
Ф’стаци
Според нутриционистите, 56 до 84 грама се доволни за да го зголемат добриот холестерол, како и за да ги симнете вишокот килограми. Интересната придобивка од ф’стаците е тоа што се единствени јаткасти плодови што содржат антиоксиданси кои ги штитат очите. Исто содржат и витамин Б6 кој помага за одржување на хормоналниот баланс.
Бразилски ореви
Бразилските ореви се богати со големо количество на селен – минерал кој го штити вашиот организам од болести. Исто така, ја штитат тироидната жлезда, ја подобруваат циркулацијата и ги намалуваат симптомите на астма. Всушност, со здрава исхрана може да спречите голем број на болести.
Лешници
Лешниците се јаткасти плодови познати по тоа што содржат витамин А и витамин Б кои превенираат развој на канцерогени клетки. Покрај овие витамини, богати се и со витамините Б6 и Б1, а од минералите ги содржат железото и цинкот. Лешниците се добра ужина за во училиште, замена за брашно во колачи, а може да ги најдете и во чоколада.
Индиски ореви
Индиските ореви содржат големо количество на магнезиум – минерал кој ја чува меморијата и го спречува стареењето. Покрај магнезиумот, овие јаткасти плодови се богати и со железо и цинк. Минералите кои ги содржи го регулираат крвниот притисок и метаболизмот.
Заклучок
Без разлика дали ги преферирате како апетисани, ужина или оброк, горенаведените јаткасти плодови содржат можеби и повеќе витамини и минерали од некои видови на овошје или зеленчук.
