Суровиот мед се користел како народен лек низ историјата и има многу различни здравствени придобивки и медицинска употреба. Честопати се користел и во некои болници како третман за рани. И денес, медот обезбедува низа здравствени придобивки. Суровиот мед, кој доаѓа директно од пчеларската кошница, содржи здрав пчелен полен, пчелен прополис и многу антиоксиданти. Многу од овие здравствени придобивки се специфични за суровиот, или непастеризиран мед. Добро е да се внимава при купувањето медот да не биде пастеризиран. Иако топлината може да ја подобри бојата и текстурата, ја отстранува кристализацијата и го продолжува рокот на траење, сепак при пастеризацијата се уништуваат и дел од неговите хранливи материи.
Според видовите на билки од кои се добива медот, тој може да биде монофлорен – добиен од само еден вид на билка и полифлорен – мед добиен од собрани нектари од повеќе видови билки. Во нашите краеви најчести видови на мед се: цветен, планински (шумски), багремов, ливадски, липов и сончогледов.
Следат неколку здравствени придобивки што може да ги понуди суровиот мед:
Добар извор на антиоксиданти
Суровиот мед содржи низа растителни хемикалии кои делуваат како антиоксиданти. Некои видови мед имаат подеднакво многу антиоксиданти како овошјето и зеленчукот. Антиоксидансите помагаат да се заштити вашето тело од оштетување на клетките како резултат на слободните радикали. Слободните радикали придонесуваат во процесот на стареење и исто така доведуваат до развој на хронични болести како што се рак и срцеви заболувања. Истражувањата покажуваат дека антиоксидантните соединенија во медот наречени полифеноли можат да играат улога во спречување на срцеви заболувања.
Антибактериски и антифунгални својства
Истражувањата покажаа дека медот може позитивно да делува во борбата против несакани бактерии и габи. Природно содржи водород пероксид кој е антисептик. Неговата ефикасност како антибактериски или антифунгален лек варира во зависност од медот, но сепак е еден од најупотребуваните народни лекови за вакви инфекции.
Лекува рани
Медот Манука се користи во медицински услови за лекување на рани, бидејќи е откриено дека е ефикасен убиец на микроби и посебно помага во обновување на ткивата. Студиите покажуваат дека медот Манука може да го намали времето на заздравување и да ја намали инфекцијата кај раните. Честопати истиот мед се споменува и во народните лекарства.
Складиште на фитонутриенти
Фитонутриенти се соединенија што се наоѓаат во растенијата и кои помагаат да се заштити растението од оштетување. На пример, некои фитонутриенти ги оддалечуваат инсектите или го штитат растението од ултравиолетово зрачење. Фитонутриентите во медот се одговорни за неговите антиоксидантни својства, како и за неговата антибактериска и антимикотична моќ. Исто така, се смета дека тие се причината што суровиот мед покажува придобивки за зајакнување на имунитетот и антиканцер својства. Треба сепак да се напомене дека тешката обработка на медот ги уништува овие вредни хранливи материи.
Решава дигестивни проблеми
Мед
Медот понекогаш се користи за лекување на дигестивни проблеми како што е дијареа. Сепак е битно да се знае која е причината за дијареата. Докажано е дека е ефикасен како третман за бактерии на Helicobacter pylori, која е честа причина за чир на желудникот. Медот е исто така моќен пробиотик, што значи дека ги храни добрите бактерии кои живеат во цревата, кои се клучни не само за варењето, туку и за целокупното здравје на човекот.
Ги смирува болките во грлото
Доколку имате настинка, земете лажица мед. Медот е стар лек против болки во грлото. Додадете го во топол чај со лимон кога ќе се појават симптомите за настинка. Функционира и како супресија на кашлицата. Истражувањата сугерираат дека медот е ефикасен како декстрометорфан, честа состојка во лековите за кашлица. Доволно е да земете една или две лажички мед и да пробате како ќе делуваат на настинката.
Добро е да се знае дека областа на алтернативно лекување кое се заснова на користење на мед се вика апитерапија и веќе со милениуми има широка примена во светот. Медот бил и ќе остане еден од најздравите производи на природата кои мошне позитивно делуваат на здравјето на човекот. Препорака е секогаш кога имате потреба од засладувач, да користите мед или производи на мед кој освен што ќе го облагородат вашето јадење, дополнително позитивно ќе влијаат и на вашето здравје од повеќе аспекти.
