Грозјето е едно од најстарите растителни култури што се одгледуваат веќе неколку илјади години. Тоа спаѓа во групата на бобесто овошје, заедно со боровинките, аронијата, капинките и други. A виното како пијалок се споменува илјадници години наназад. Се верува дека постојат речиси 5000 сорти грозје во светот. За да се одгледува винова лоза и квалитетно грозје, потребно е да се има посебно поднебје, топла и сончева клима, земјиште, но и доста напорна работа.
Сорти на грозје
Постојат вински и трпезни сорти на грозје. Едните служат за добивање вино, додека другите се за јадење. Винското грозје најчесто е доста поблаго од трпезното бидејќи еден од предусловите за да се добие добро вино е висока застапеност на шеќер во самиот плод.
Од трпезните сорти најзастапени кај нас се: Афус али, Кардинал, Хамбург мускат и Бело зимско грозје.
Најпознатите и најкористените сорти на грозје од кои се прават најквалитетните и најкупуваните вина се следните: Каберне Совињон, Мерло, Мускат Отонел, Пино Ноар, Ризлинг, Ркацители, Шардоне, Совињон Бланк, Темјаника, Траминер розов и многу други.
Што содржи грозјето?
Зрното грозје е богато со минерали, витамини и други лековити состојки, а семето од грозје има силно антиоксидативно дејство врз телото.
Тоа е добар антиоксиданс и делува против бактерии и вируси, а се користи и во фармацевските и козметичките производи.
Грозје во исхраната
Во зависност од сортата, свежото грозје е достапно во маркетите од средината на летото до крајот на есента. Истото може да се конзумира во друга форма во текот на целата година и тоа како: суво грозје, вина, сокови, џемови, вински оцет и многу други производи.
Најдобро и најбогато со корисни состојки е свежото грозје. Тоа изобилува со: растителни влакна, витамини А, Б, Ц и Е, минерали, метали во микро-количини, целулоза, фруктоза, гликоза и многу други. Лесно се преработува во организмот и брзо се одразува на здравстваната состојба на лицата кои го консумираат.
Винскиот оцет има големи предности како зачин и додаток на храната. Винскиот оцет се препорачува за слаба циркулација, габични инфекции, кожни болести, проблеми со варењето и усната шуплина.
Чистите сокови од грозјето, но и коктели со други овошни сокови, се многу корисни и посебно освежувачки во текот на летниот период.
Суво грозје се користи од античките времиња во исхраната, особено за правење десерти. Тоа е најчесто користено суво овошје во светот. Доста брзо ја зголемува енеријата, па затоа и многу често го користат спортистите пред интензивните вежби и натпревари.
Еден од најкорисните ефекти кои го има грозјето односно производите од грозје е позитивното влијание врз срцето и крвните садови. Се разбира, умереноста е она што ја прави разликата помеќу добрите и лошите ефекти од конзумирањето на вино. Како информација, во просек е потребно околу 1,42 kg грозје, за да се добие 1 l вино.
Најважна корист од грозјето за нашето здравје
За лековитите ефекти на грозјето и виното се зборува во легендите, песните и приказните уште од античко време, а денешното модерно истражување го потврдува тоа.
Грозјето содржи многу есенцијални витамини и минерали. Богато е со антиоксиданси кои штитат од хронични здравствени состојби како што се дијабетес, рак и срцеви заболувања. Тоа помага намалувањето на крвниот притисок и холестеролот, но и многу други болести.
Грозјето е идеално за диета, затоа што внесувате вкусно и здраво овошје кое делува како лаксатив, т.е. помага во проблемите со варењето на храната. Бидејќи е богато со железо помага при умор и деконцентрација, а позитивно влијае на здравјето на очите.
Грозјето освен што докажано го помага нашето целокупно здравје, дополнително е интересно да се потенцира дека го забавува процесот на стареење и му помага на телото да се бори против токсините, вирусите и ракот.
Познато е дека Французите и другите медитерански народи, покрај медитеранската исхрана, јадат многу грозје и пијат вино во умерени количини, па затоа имаат помалку проблеми со срцето и крвните садови. Медитеранот важи како поднебје каде луѓето се долговечни.
