Официјално започна сезоната за подготовка на зимница во нашата земја. Едно од најомилените традиционални јадења и претставник на зимницата е токму ајварот. Ајвар претставува јадење направено во најголем дел од црвени пиперки и други додатоци. Ајварот кој е приготвен во домаќинствата по традиционални рецепти што се правеле генерации наназад е исклучително вкусен. Ајварот е еден од највкусните специјалтети на Балканот, а потекнува токму од Македонија.
Највкусниот традиционален ајвар се подготвува во домашни услови и за негова подготовка е потребна исклучително напорна работа и време. Се приготвува при крајот на летото или почетокот на есента.
Најпрво на отворено се печат црвени пиперки, на шпорет на дрва, а потоа се ставаат во пластични кеси за да набабрат, за полесно да може да се излупат. Потоа, следува лупење на пиперките, отстранување на семките и собирање на пиперките во сад во кој можат да се исцедат убаво преку ноќта. Следниот ден се мелат во машинка за мелење месо и се пржат на тивок оган. Сите различно го приготвуваат својот ајвар. Некои во смесата додаваат мелени домати или моркови, а многу често се користи модриот патлиџан како додаток на традиционалниот ајвар.
Ајвар подготвен на традиционален начин
За подготовка на вкусен ајвар потребно е најпрво да се одберат квалитетни црвени пиперки. Тие се карактеризираат со малку подебели ѕидови на пресек, што ги прави попогодни за обработка, во споредба со потенките пиперки кои се погодни за сушење.
Состојки:
- Црвени пиперки – 1 вреќа (25 – 30 kg)
- Масло – 2 l
- Сол – по желба
Подготовка:
- Се мијат пиперките и им се отстрануваат дршките и семките.
- Се печат и се ставаат во сад со капак или најлонска вреќа.
- Се лупат и се чистат преостанатите семки. Се ставаат во сад за цедење и најдобро е да се стават во фрижидер додека се цедат, околу 12 часа.
- Исцедените пиперки се мелат со машинка за мелење месо.
- Се ставаат за пржење во големо тенџере на умерено силен оган. Повремено се додава масло и сол во пржењето и се мешаат со голема дрвена лажица.
- Ајварот се пржи отприлика 2-3 часа, зависно од количината, температурата и големината на тенџерето. Во принцип е готов кога почнува да се „лепи“ на дрвената лажица и не паѓа кога ќе ја поткренете лажицата. Додека на дното од тенџерето се појавува трага при мешањето. Во тој момент, ајварот е готов.
- Готовиот ајвар се става во чисти стерилизирани тегли кои се затвораат веднаш со капак. Полните тегли со ајвар се ставаат во загреана рерна на 100°C околу 10-15 мин, а потоа се оставаат да се изладат.
Ајвар со модри патлиџани и моркови
Доколку сакате да испробате нешто ново, но подеднакво вкусно, може да додадете и модри патлиџани и моркови.
Состојки:
- Црвени пиперки – 1 вреќа (25 – 30 kg)
- Модри патлиџани – 8 пар
- Морков – 3 кг
- Масло – 2 l
- Шеќер – 8 лажици
- Сенф – 8 лажици
- Сол – по желба
Подготовка:
- Се мијат пиперките и им се отстрануваат дршките и семките. Се печат и се ставаат во сад со капак или најлонска вреќа.
- Модрите патлиџани исто така се печат.
- Се лупат и се чистат преостанатите семки. Се ставаат во сад за цедење заедно пиперките и модрите патлиџани, во фрижидер околу 12 часа.
- Морковите се лупат, се мијат и се варат додека убаво не омекнат.
- Сите се мелат со машинка за мелење месо.
- Сите заедно, се ставаат за пржење во големо тенџере на умерено силен оган. Повремено се додава маслото, солта и шеќерот во пржењето и се мешаат со голема дрвена лажица.
- Ајварот се пржи отприлика 2-3 часа, зависно од количината, температурата и големината на тенџерето. 10 минути пред крајот се додава сенфот. Ајварот е готов кога ќе почне да се „лепи“ на дрвената лажица и не паѓа кога ќе ја поткренете лажицата. Додека на дното од тенџерето се појавува трага при мешањето. Во тој момент, ајварот е готов.
- Готовиот ајвар се става во чисти стерилизирани тегли кои се затвораат веднаш со капак. Полните тегли со ајвар се ставаат во загреана рерна на 100°C околу 10-15 мин, а потоа се оставаат да се изладат.
Зелен ајвар – Малиџано
Разликата кај овој ајвар е што наместо црвени пиперки, се прави со зелени. Но, истиот рецепт може да се направи со црвени пиперки.
Состојки:
- Зелени пиперки – 1 вреќа (25 – 30 kg)
- Модри патлиџани – 10 пар
- Масло – 1,5 l
- Шеќер – 100 g
- Сенф – 4 лажици
- Вински оцет – 50 ml
- Сол – по желба
Подготовка:
Подготовката е иста како кај претходните рецепти, со тоа што при крајот се додаваат шеќерот и оцетот, додека последен на крај се додава сенфот, 10 минути пред крајот.
По желба во сите рецепти може да додадете и лути пиперки, за да добиете малку пикантен вкус.
Следно ви преостанува да одберете вкусно сирење и топло лепче од најблискиот маркет и да го вкусите направениот ајвар.
Освен традиционалната подготовка на ајварот, денес имате многу голем избор на ајвар кој се продава во маркетите. Ќе најдете вкусови кои во голема мера се слични со оној, домашниот.
