Никогаш не можете да погрешите со тестенините. Од приготвување на вечера за гости до брз оброк за вашите деца, тестенините нудат задоволство поради нивната разновидност и бесконечни комбинации на вкусови. Се проценува дека има околу 350 различни видови тестенини.
Во однос на составот најчесто се застапени тестенини направени од тврда пченица, но призводителите нудат разни верзии без глутен, кои можат да бидат направени од пченкарно, оризово, хељдино брашно или други брашна без глутен. Можете исто така да купите интегрални тестенини од цело зрно пченица, како поздрав начин за конзумирање на омилените јадења со тестенини. Доста застапени се и тестенините во боја, кои се обојуваат со додавање на сушен спанаќ или сушени домати при нивното производство. Во поново време често среќаваме готови инстант опции на тестенини со сос, за деновите кога сме кратки со време.
Кои се најпопуларните форми на тестенини?
Првото јадење со тестенини што ви паѓа на памет веројатно се некакви тестенини со традиционален доматен сос, но тестенините даваат многу повеќе опции за комбинирање на вкусови и форми. Предизвик е да се избере вистинскиот тип на тестенини. Секој вид тестенини има уникатни квалитети што ги прави посоодветни во комбинација со одредени сосови и начини на готвење. Следно ќе разгледаме неколку предлози на форми на тестенини и како да ги искомбинирате во вкусно и хранливо јадење.
Макарони
Можеби најомилениот вид на тестенини кај децата. Познатите макарони со сирење или други млечни производи се најчест избор за брз и вкусен оброк. Нивната цевчеста форма е совршена за крем сосови или други додатоци кои ја полнат шуплината од внатрешната страна. Можат да бидат со различна должина, прави како цевки или свиткани во форма на буквата „С“. Најчесто се комбинираат со сирење, со месо или со зеленчукови сосови. Времето за готвење за овој вид тестенини е од 8 до 10 минути.
Шпагети
Шпагетите се едни од најпознатите видови тестенини. Веројатно затоа што шпагетите и познатиот болоњезе сос се едно главно јадење со тестенини што скоро сите го вкусиле во даден момент. Тие имаат форма на долги, тенки и кружни тестенини што прекрасно се спојуваат со мноштво вкусови. Најчесто се комбинираат со песто сос, доматен сос, мелено месо, кремаст пармезан, сланина, печурки, брокула, каперси и друго. Времето за готвење за овој вид тестенини е од 8 до 10 минути.
Лазањи
Постојат повеќе видови тестенини со правоаголна форма на лист, но лазањите се едни од најчесто користените кај нас. Традиционално лазањата се прави со мелено месо, бешамел сос, кашкавал, доматно пире и разни зачини по вкус. Во последно време се многу актуелни и вегетаријанските лазањи со сецкани зеленчуци и моцарела сирење. Лазањите претходно се варат, но има и такви лазањи кои се претходно зготвени и дехидрирани, па влагата од сосовите е доволна за да ги рехидрирате, без да мора да ги варите одделно пред да ги печете.
Фиде
Фиде тестенините се во форма на тенки извртени ленти и наликуваат на тенки шпагети извртени во снопче. Сепак, разликата помеѓу шпагетите и фидето е тоа што фидето е многу кревко, тенко и нежно. Најидеални се за во супа, каде ги ставаме искршени, во чорба или други разни варива. Можат да се комбинираат со доматен сос или песто сос. Поради нивната многу тенка форма потребно им е многу кратко време за готвење, од 3 до 5 минути.
Фусили
Овие видови тестенини му даваат неочекуван и интересен вкус на секое јадење со својата спирална форма. Поради нивната специфичната форма, лесно можат да го апсорбираат вкусот на сосот. Овие тестенини добро се спојуваат со скоро секој сос, но исто така прават одлични летни салати со тестенини што можете да ги носите кога одите на пикник или на работа. Познати јадења со овие видови тестенини се разните салати со тестенини, фусилите со кремаст сос и пилешко или фусили со лук и пармезан, со 4 видови сирења, карбонара сос и др. Времето за готвење за овој вид тестенини е од 11 до 13 минути.
Канелони
Познати се една група на тестенини кои се користат за да се наполнат со вкусно ситно полнење од зеленчуци или протеини. Ги има многу врсти: тортелини, равиоли, школки, канелони и др. Сепак овде ги издвоивме канелоните кои се со цевчеста форма, површината им е мазна како кај лазањата и се многу едноставни за полнење. Најчесто се полнат со разни сирења и сос од домати. Како и лазањите, канелоните можат да се купат претходно зготвени и дехидрирани, без да мора да ги варите одделно пред печење.
При изборот на тестенини во продавница, најпрво размислете за сосот што планирате да го подготвите. Долгите и тенки тестенини најдобро се комбинираат со полесни и кремасти сосови. Додека ако приготвувате посилен сос, држете се до некоја од пократките видови тестенини. Сепак доколку ви недостасува инспирација, можете да го прочитате и нашиот блог со предлог сосови за тестенини или да се инспирирате од нашите прилози со рецепти.
