Велигден е еден од најомилените празници. Убавото време, богатата трпеза и обичаите ги собираат најблиските во домот. Особен украс се традиционалните велигденски јајца, за кои што сите знаеме дека се бојадисуваат во црвена боја. Сепак, тоа не значи дека не може да се забавувате во кујната и да ги бојадисате малку поинаку годинава, со цел да ги разиграте боите во домот.
Бојадисувањето на велигденски јајца е една од најпознатите традиции која се практикува низ целиот свет. Секоја година, децата и возрасните традиционално низ целиот свет бојадисуваат јајца на различни начини и воодушевуваат многумина со своите идеи.
Што ви е потребно за да имате убави велигденски јајца?
Важно да имате свежи бели или кафеави јајца. Потребно е да ги оставите преку ноќта да бидат на собна температура. Доколку сакате потемни бои на јајцата, можете да ги варите во самата боја, додека за посветли бои, ставете ги јајцата во растворената боја околу една до две минути после варењето. За светли бои може да користите бели јајца, додека за темни – кафеави јајца.
Можете да ја проверите свежината на јајцата потопувајќи ги во сад со ладна солена вода. Ако потонат, тоа значи дека се свежи.
За да избегнете пукање на јајцата при готвење, ставете лажичка оцет во водата или пак сол. Варете ги јајцата на пониска температура. Јајцата исто така може да се варат на пареа, но потребно е малку подолго време, околу 25-30 минути. Доколку сакате лесно да се лупат јајцата, потопете ги во ладна вода веднаш штом ќе ги сварите.
Пред да почнете да ги бојадисувате јајцата, потребно е да ги измиете под млаз млака вода или да ги избришете со крпа натопена во оцет.
Бојадисаните јајца ќе добијат висок сјај и боите ќе бидат поинтензивни ако по бојадисувањето ги премачкате со салфетка на која претходно сте нанеле малку масло.
Во продолжение ви претставуваме неколку креативни начини како да ги бојадисате и украсите вашите велигденски јајца.
Мермерни јајца
Истурете 500 – 700 ml вода на собна температура во пластичен сад од 1 l. Истурете неколку капки лак за нокти во водата во боја по ваша желба и нежно промешајте со дрвен стапче. Ставете ракавици и потопете го јајцето во водата. Извадете го и ставете го да се суши.
Јајца декупаж
Откако ќе се оладат јајцата, земаме дизајнирани шарени салфетки и со мали ножичички се сечат некои интересни елементи од нив, што сакаме да ги аплицираме на јајцата. Со четка за боење и изматена белка од јајце ги премачкуваме јајцата на местото каде сакаме да ги поставиме исечоците од салфетките. Откако ќе ги залепиме исечоците, повторно премачкуваме со белката од јајце, ја измазнуваме салфетката, доколку се затуткала, и ги оставаме да се исуши убаво до следниот ден. Следниот ден може само да ги премачкате со масло за да добијат убав сјај.
Велигденски јајца како „галаксија“
Најпрво обојте ги јајцата во црна боја и оставете ја да се исуши. Земете повеќе нијанси на акрилни бои и тоа сребрена, златна, сина и виолетова. Наизменично нанесувајте ги боите со тапкање со помош на сунгерче, но водете сметка да се сушат слоевите на бои кои ги нанесувате. Нанесете златни светки во трагови, и на крај испрскајте ги многу дискретно со бела боја, нанесувајќи бели ситни точки.
Омбре јајца
Омбре стилот е доста популарен во последно време. Постапката за вакво обојување, барем кај јајцата е многу едноставна. Ставете ги заедно јајцата во водата со боја и вадете ги едно по едно на одреден временски интервал, зависно од тоа колку сакате бојата да се разликува. На тој начин ќе се обојат со различен интензитет и ќе го добиете саканиот ефект. На овој начин во вашиот дом ќе доминира само една одредена боја или повеќе, но во различни нијанси.
Црно-бели јајца
Потребни ви се бели јајца и црн танок маркер. На едноставен начин може да се постигнат многу креативни идеи само со цртање разни шари со црн маркер.
Јајца Миниони
За оваа цел ви е потребна жолта и сина боја, така што би ги потопувале јајцата до половина, прво едната страна во сината боја, па потоа другата половина во жолтата боја. Ви требаат пластични очи и црн маркер.
Металик јајца
Овие обојувања можат многу едноставно да се добијат со боите кои се продаваат во маркетите. Изгледаат многу елегантно и можат да бидат убава декорација во вашиот дом.
Златни јајца
Во маркетите исто доста се продаваат ваквите бои. Изгледаат многу убаво во комбинација со традиционалните црвени јајца, и ќе им дадат еден убав богат изглед на вашата трпеза велигденска трпеза.
Кристални јајца
Tајната на ваквото обојување е во винската киселина, која ја додаваме. Кристалите се ставаат при самото варење на јајцата. Крајниот резултат се јајца кои изгледаат како зашеќерени.
Бојадисување со пастелни бои
Доколку не ги сакате јаките интензивни бои на велигденските јајца, ви ја препорачуваме оваа техника на бојадисување која трае најкратко. Едноставно ги ставате јајцата во бојата и кратко ги држите додека да добијат побледо обојување. На овој начин ќе добиете елегантна декорација во вашиот дом.
Детски јајца
Овде оставаме на фантазијата на децата да нацртаат нешто интересно. Може да бојадисате претходно јајцата во пастелни бои, со што ќе имаат дискретна позадина на која лесно ќе може да се нацрта било што. Земете четки, бои, чепкалки за заби, фломастери со кои можете да цртате на веќе обоени јајца. Китки, цвеќиња, бранови, ленти се мотиви кои можете лесно да ги нацртате, а крајниот резултат ќе бидат убави, весели и разиграни јајца.
Доколку крајниот резултат на вашите јајца не е како тие на фотографиите – не очајувајте. Најважно е да уживате додека го работите тоа и да му додадете на домашниот амбиент малку повеќе боја. Имајте убави празници.