Туршијата е традиционална македонска зимница која ја приготвуваме секоја есен. Постојат многу начини како може да приготвите туршија од голем број на зеленчуци кои ги има на нашето поднебје. Туршијата се приготвува во многу земји, но е особено карактеристична за земјите од Балканскиот Полуостров и Блискиот Исток. Примарната цел за подготовка на туршија е да се надополни недостатокот од некои зеленчуци кои во текот на зимата не се достапни.
Туршијата претставува конзервиран зеленчук. Таа се консумира главно како предјадење или како мезе. Најчесто се прави од зелени пиперки, зелени домати, краставици, карфиол, моркови, зелка и друго. Во помала количина најчесто се складира во тегли, а во поголема количина подготвувањето се прави во пластични или дрвени буриња.
Припрема за туршија
Многу е важно зеленчукот што ќе го бирате за туршија да биде свеж, здрав, цврст, без меки делови и без знаци кои укажуваат дека зеленчукот венее. Карфиолот да биде бел, без темни делови, пиперката крцкава, морковите и краставиците да не бидат меки.
Зеленчукот кој е предвиден за подготовка на туршија, потребно е убаво да се измие. Може да отсои 15 минути во вода со сода бикарбона и убаво да се измие со кујнска четка доколку има потреба. Садовите каде што ќе се конзервира туршијата, исто така треба убаво да се измијат и стерилизираат.
Морковите треба да се излупат, дршките на пиперките и врвовите на краставиците да се отсечат, карфиолот да се подели на мали цветчиња, а зелката да се провери убаво и да се извадат надворешните лисја. По желба може да се сечкаат на мали парчиња.
Во продолжение ви нудиме неколку најубави рецептите за туршија кои се приготвуваат кај нас.
Царска салата – туршија
Оваа салата се приготвува со црвените ајварски пиперки, кои не мора да ги користите само за подготовка на ајвар. Тие се одличен додаток во царската туршија.
Состојки за салатата:
- Моркови – 1 kg
- Црвени пиперки – 1 kg
- Краставички – 1 kg
- Зелени домати – 1 kg
- Свежа зелка – 1 kg
- Карфиол – 1 kg
Состојки за течноста:
- Сончогледово масло – 200 ml
- Шеќер – 200 g
- Сол – 100 g
- Алкохолен оцет – 750 ml
- Конзерванс – 1 кесичка
- Црн бибер во зрно – 1 кесичка
Подготовка:
Во еден голем сад го додавате исечканиот зеленчук заедно со останатите продукти, исклучувајќи го биберот. Добро се промешува и на крај површината над салатата се притиска со нешто тешко, потоа се остава да отстои 24 часа, за соковите од зеленчуците да се измешаат во смесата.
Следниот ден се додава биберот, се промешува и се реди во тегли, така што се полнат убаво теглите со зеленчуците, а на крај се додава и течноста. Од оваа доза се добиваат 7-8 тегли со туршија.
Руска салата – туршија
Една од највкусните зимски салати, без кои не може да се замисли зимницата е руската салата. Уште е позната и под називот мешана салата.
Состојки за салатата:
- Моркови – 1 kg
- Краставички – 1 kg
- Карфиол – 1 kg
- Зелка – 1 kg
- Зелени пиперки – 0,5 kg
- Зелени домати – 0,5 kg
Состојки за течноста:
- Вода – 250 ml
- Сончогледово масло – 500 ml
- Шеќер – 250 g
- Сол – 150 g
- Алкохолен оцет – 750 ml
- Црн бибер во зрно – 1 кесичка
Подготовка:
Целиот зеленчук се мие и се сечка. Морковот се бланшира околу 5 минути и откако ќе се олади, се сечка на кругови. Се меша целиот зеленчук и се става во тегли.
Во тенџере се ставаат состојките за течноста и се варат на пониска температура додека не зовријат. Со зовриената течност се прелева зеленчукот во теглите и се затвара со метални капаци.
Салатата може да се јаде веќе следниот ден.
Медицинска салата – туршија
Вистински специјалитет кога станува збор за туршија е медицинската салата, која има пикантен вкус. Секако доколку не сакате луто, може да се намали количината на лути пиперки во неа.
Состојки за туршија:
- Моркови – 1,5 kg
- Везени пиперки – 0,5 kg
- Благи тенки пиперки – 1,5 kg
- Магдонос – 1 китка
- Лук – 1 главица
- Зелени домати – 0,5 kg
Состојки за течноста:
- Сончогледово масло – 400 ml
- Шеќер – 150 g
- Сол – 100 g
- Вински оцет – 500 ml
- Аспирин – 2 таблети
- Конзерванс – 1 пакетче
Подготовка:
Прво се подготвува течноста, за да може состојките да се растворат се промешува повремено. Се лупат морковите и се подваруваат околу 10 мин. Откако ќе се изладат се сечкаат на кругови. Се потпекуваат кратко пиперките и исто се сечат на кругови.
Се мие и се сечка магдоносот и лукот. Сите состојки се ставаат во длабок сад, се мешаат и им се додава течноста. Се остава салатата да отстои 24 часа. Потоа наредниот ден се собира салатата во тегли и се остава на темно и суво место. Може да се јаде веќе по неколку дена.
Има огромен избор на идеи за туршија и генерално на зимница што традиционално се подготвува во нашата земја. Сепак, доколку сте кратки со време, во маркетите имате огромен избор на зимница, а од туршија може да ги сретнете следните производи: мешана салата, корнишони, феферони, цвекло и многу други.
