Новогодишниот период е најубавиот период од годината кога можете да се видите со најблиските и да уживате во добра храна. Салатите се добар избор за новогодишната трпеза затоа што може да се комбинираат со различни видови на закуски. А покрај тоа, трпезата ќе добие побогат изглед.
1. Пилешки стапчиња
Пилешките стапчиња се добра алтернатива за традиционалните вкусови. Оваа година може да го пробате благо-пикантниот мексикански вкус на стапчињата и да направите тематска прослава.
Потребните состојки се следниве:
- 8 лепчиња тортиља
- 80 g Хумус
- 400 g пилешки стек
- 4 лажици масло
- 300 g Мексиканска мешавина
- 250 ml Мексикански сос
- 1 лажичка бибер
- 40 g пармезан
- Сол
Начин на подготовка:
Исечкајте го пилешкото месо и испржете го на малку масло, со сол и бибер по вкус. Пред крај на пржењето, во пилешкото додајте го мексиканскиот сос и мексиканската мешавина. Гответе уште неколку минути додека да се соединат состојките. Тортиљите од едната страна премачкајте ги со хумус, а потоа филувајте ги со подготвеното пилешко и завиткајте ги цврсто, во вид на стапчиња. Завитканите стапчиња наредете ги во тавче, а врз нив наросете пармезан и потпечете ги во претходно загреана рерна на 180 степени околу 10-15 минути. Послужете ги топли.
2. Руска Салата
Руската салата е мешавина од повеќе зачини и може да се каже дека крајниот вкус е доста богат. Можеби токму поради тој вкус, руската салата е една од омилените и најчестите салати на новогодишната трпеза.
Потребните состојки се следниве:
- 2 компири
- 2 моркови
- 2 јајца
- 200 g грашок
- 4-5 кисели краставички
- 200 g шунка
- 200 g кашкавал
- 250 g мајонез
- Црн бибер
- Сол
Начин на подготовка:
Најпрво сварете ги компирите, морковите и јајцата, а доколку треба и грашокот. После тоа исцедете ги убаво, па исечкајте ги на ситни коцки и ставете ги во сад. Исечкајте ги на ситни коцки киселите краставички, шунката и кашкавалот и додајте ги во садот заедно со останатите исечкани состојки. Додајте го мајонезот и промешајте се заедно.
3. Кифлички
Кифличките се задолжителни на новогодишната трпеза. Без разлика дали ќе го изберете традиционалниот начин на подготовка или ќе ги зачините, тие се секогаш вкусни.
Потребните состојки се следниве:
- 500 g брашно
- 1 пакетче сув квасец
- 250 ml јогурт
- 1 лажичка сол
- шеќер
- 1 јајце
- 5 лажици масло
- 100 ml топла вода
- Сусам
- 1 жолчка од јајце
Начин на подготовка:
Сувиот квасец, топлата вода и шеќерот промешајте ги и почекајте да се активира, а потоа додајте ги останатите состојки. Замесете меко тесто и оставете го да стаса на собна температура. Од стасаното тесто формирајте топчиња а потоа едно по едно расукајте ги. На секое од расуканите топчиња исечете вертикално три ленки линии и завиткајте ги. Наредете ги во тава за печење и премачкајте ги со изматена жолчка и одозгора посипете ги со сусам.
4. Телешка салата
Често се подготвува како именденска салата, но одлично се комбинира со било кој додаток на новогодишната трпеза. Богата е со повеќе зачини и заситува, а може да ја декорирате по желба.
Потребните состојки се следниве:
- 1 kg телешко месо
- 2 главици кромид
- 6 варени јајца
- 1 тегла кисели краставички
- 1 тегла сецкани шампињони
- 1 тегла мајонез
- Сол
- Црн бибер
Начин на подготовка:
Месото ставете го да се вари во солена вода. Кога ќе се свари извадете го од водата, исечкајте го ситно и ставете го во длабок сад. Во садот со месо додајте ги исечканите печурки, исечканите краставички, кромид и јајца. Промешајте ги состојките и додајте го мајонезот. На крај додајте малку сол.
5. Солени палачинки
Убавината на палачинките е во тоа што може да ги правите по ваш вкус. Благи, солени или зачинети – во нивниот вкус уживаат од најмалиот до најстариот член во фамилијата. Дополнително ќе ја збогатат новогодишната трпеза, за повеќе идеи, може да се инспирирате од прилогот со рецепти на Рептил.
Потребните состојки се следниве:
- 5 јајца
- 12 лажици брашно
- 500 ml млеко
- 1 лажиче сол
- 1 пециво
- 50 g маргарин
- 200 g пилешки гради
- 200 g кашкавал
Начин на подготовка:
Во длабок сад, пенесто изматете ги јајцата, додајте сол, пециво, млеко и брашно. Во загреана рерна ставете ја тавата во која ќе ја печете палачинката, претходно намачкана со маргаринот. За неколку минути, кога ќе се стопи и загрее маргаринот, извадете ја тавата и во неа истурете ја подготвената смеса за палачинки. Печете ја палачинката околу 15 минути. Кога ќе се испече, извадете ја од рерна, ставете го кашкавалот и пилешките гради одозгора, завиткајте во ролат и послужете ја на новогодишната трпеза додека е топла. По желба, одозгора може да додадете кечап.
6. Крем салата со авокадо и пченка
Крем салатата е одличен додаток за новогодишната трпеза ако сакате да испробате нов вкус. Лесна е за подготовка, освежителна, и може да ја искомбинирате со било која закуска.
Потребните состојки се следниве:
- 250 g кравјо сирење
- 2 парчиња авокадо
- 200 g кисела павлака
- ½ лажичка лук во прав
- ½ лажичка босилек
- 300 g пченка замрзната
- 4 лажици мајонез
- 3 лажици сок од лимон
Начин на подготовка:
Авокадото исечете го на половина и извадете ја семката. Излупете го и исечкајте го на мали парчиња. Потоа, прелијте го со лимонов сок за да не ја изгуби бојата. Сирењето исечкајте го на ситни коцки. Сварете ја пченката, исцедете ја и оставете да се олади. Сите состојки и зачините измешајте ги заедно и послужете ја новогодишната трпеза.
Заклучок
Новогодишната трпеза е убаво да биде богата со повеќе вкусови, а за тоа салатите и закуските се одличен избор. Нивната добра страна е што може да експериментирате и да ги подготвите на ваш начин. Од едноставни салати и закуски, до повеќе зачинети – може да ги прилагодите според сечиј вкус.
