Сирењето е млечен производ кој доаѓа во стотици различни текстури и вкусови. Се произведува со додавање бактерии во млекото од разни фармски животни, со негово понатамошно зреење или преработка на цврстите делови од млекото. Сирење се произведува насекаде во светот во најразлични вкусови и форми. Тоа се состои од млечни протеини и масти, и најчесто сирење се прави од кравјо, овчо и козјо млеко.
Нутритивниот состав и вкусот на сирењето ќе зависат најмногу од тоа како се произведува тоа сирење и какво млеко се користи за таа намена. Сирењето е одличен извор на протеини, калциум и многу други хранливи материи.
1. Козjo сирење
Козјото сирење е меко сирење направено од козјо млеко. Тоа е полесно за варење и е најмалку масно. Се препорачува на лицата чувствителни на лактоза, бидејќи ја содржи во минимални количини. Ова сирење е широко консумиран млечен производ.
Може да се додаде во многу јадења, салати, сендвичи, пици, омлет и друго. Вкусно е да се јаде како закуска на даска, искомбинирано со разни крекери или овошје.
2. Моцарела
Моцарелата е меко, бело сирење со потекло од Италија и обично се прави од млеко од биволица или крава. Ова сирење содржи многу ниско ниво на сол и калории од повеќето други сирења, а воедно е многу богато со протеини. Моцарелата содржи бактерии кои дејствуваат како пробиотици и се мошне корисни за нашиот организам.
Моцарелата може да ја јадете во свежа салата од домати, босилек и балсамичен оцет, но може да се додаде и во многу други рецепти како пици, тестенини и слично.
3. Фета
Фета е меко, солено, бело сирење по потекло од Грција. Обично е направено од овчо или козјо млеко. Фетата добиена од овчо млеко има лут и остар вкус, додека фета сирењето од козјо млеко е поблаго. Бидејќи фетата е спакувана во саламура, за да се зачува свежината, таа може да биде богата со сол. Но и покрај тоа таа содржи помалку калории од повеќето други сирења.
Фета сирењето може да се додава во салати, во омлет или да се користи за мачкање на лепче искомбинирано со свежи зеленчуци.
4. Урда
Урда е млечен производ направен од кравјо млеко. Се смета дека потекнува од Америка. Урдата има многу повеќе протеини отколку другите сирења. Таа содржи малку калории и често се препорачува за слабеење.
Има одличен вкус на тост или во омлет, може да се додава во смути или да се користи како основа за правење некој намаз или сос. Во маркетите може да се најде урда со различен степен на соленост, па така неутралната урда, која има најмал процент на сол, може да се користи и во десерти.
5. Пармезан
Пармезан е тврдо, старо сирење/кашкавал , кое има густа текстура и солен вкус на орев. Изработено е од сурово, непастеризирано кравјо млеко. Пармезанот зрее најмалку 12 месеци, за да го добие својот комплексен вкус. Тој е богат со хранливи материи, особено со калциум и фосфор, што го прави особено погоден за здравјето на коските. А бидејќи зрее долго време, пармезанот е многу низок во лактоза и можат да го јадат луѓе кои имаат нетолеранција на лактоза.
Рендан пармезан може да се додаде во салати, тестенини и пици. Можете исто така да го посипете на јајца или на намачкани лепчиња на даска со сирење, овошје и ореви.
6. Швајцарскo сирење
Како што сугерира името, швајцарското сирење потекнува од Швајцарија. Најкарактеристичното вакво сирење/кашкавал во Швајцарија е наречено ементал. Тоа е полутврдо жолто сирење/кашкавал , обично направено од кравјо млеко со благ вкус и карактеристични дупки со големина на лешник. Тоа има низок процент на натриум и масти, во споредба со повеќето сирења.
Швајцарското сирење/кашкавал се топли многу лесно, па може да го додадавате во сендвичи, тестенини, плескавици, пици и друго. Може да го исечете на мали парченца и да го послужите со други видови сирења на даска искомбинирано со разно овошје или зачинети крекери. Одлично се комбинира со мерло, ризлинг или шампањ, додека за љубителите на пиво, совршено оди со светло пиво.
7. Чедар
Чедар е едно од најпопуларните сирења /кашкавали во светот, а потекнува од Англија. Направено од кравјо млеко, зреано во текот на неколку месеци, може да биде бело или жолто. Вкусот на чедарот зависи од сортата, од благ до екстра остар.Покрај тоа што е богат со протеини и калциум, чедарот е многу добар извор на витамин К.
Можете да го консумирате во бургери, јадења со зеленчук, јадења со јајца, како закуска на даска со месо, овошје и лепчиња или пак во разни пити.
8. Сино сирење
Синото сирење се добива од кравјо, козјо или овчо млеко, со култури од мувлата Пеницилиум. Обично е бело со сини или сиви линии и дамки. Калапот што се користи за создавање сино сирење му дава карактеристичен мирис и вкус. Синото сирење е многу хранливо и содржи повеќе калциум од повеќето други сирења.
Синото сирење претставува вистински деликатес кој е пожелно да се комбинира со добро вино. Нуди одличен вкус на хамбургери, пици и салати направени со спанаќ, ореви и јаболка или круши.
9. Рикота
Рикота е кремасто, бело сирење, богато со протеини. Тоа е италијанско сирење кое содржи висококвалитетната сурутка, а е направено од водени делови од кравјо, козјо, овчо или биволско млеко, што останало од правење други сирења. Рикота има кремаста текстура и често се опишува како полесна верзија на урда.
Сирењето Рикота е вкусно во салати, омлет, тестенини и лазања. Исто така, може да се користи како основа за кремасти намази или да се служи со овошје како слатко-солена закуска.
Повеќето сирења/кашкавали освен што се добар извор на протеини и калциум, нудат дополнителни здравствени придобивки како подобра дигестија, помагаат во губење на тежината, го подобруваат здравјето на коските и го намалуваат ризикот од срцеви заболувања. Секако треба умерено да се консумираат, особено сирења кои се богати со сол или масти, на тој начин сирењето придонесува за практикување на здрава и урамнотежена исхрана.
