Доколку водите здрав живот и вежбате за да бидете фит, потребна ви е здрава исхрана за да постигнете резултати. Ако внесувате здрава храна пред тренинг за енергија, исто важно е да јадете здрави оброци после тренинг. За оваа цел, ви подготвивме неколку идеи инспирирани од маркетите на Рептил.
1. Банана Палачинки
Доколку сте од оние кои се будат и вежбаат во раните утрински часови, овие банана палачинки комплетно ќе ви ја вратат енергијата после тренинг.
Потребните состојки се следниве:
- 200 гр брашно
- 1 лажица шеќер
- 2 лажички прашок за печиво
- ½ лажичка сол
- 1 јајце
- 250 мл млеко
- 2 банани
- 100 гр мед
- 100 гр малини
- Цимет
- 2 лажици маслиново масло
Начин на подготовка:
Во сад измешајте го брашното, шеќерот, прашокот за печиво и солта. Во друг сад, измешајте го јајцето (претходно изматено), млекото, маслиновото масло и испасираните банани. Мешавината од брашното измешајте ја со смесата од испасираните банани.
Смесата што ќе ја добиете ќе биде со мали грутчиња. Згрејте подмачкана тава со масло, на средна температура. Истурајте со лажичка од тестото, од околу ¼ чаша и пржете додека палачинките не добијат златна боја. Јадете ги додека се топли и декорирајте ги со ореви, мед, малини и цимет.
2. Лосос Котлети со Мед и Сенф
Добри оброци после тренинг се оние кои вклучуваат доволно протеини и хранливи вредности. Во овој случај тоа се лососот и медот, а сенфот само додава дополнителен вкус – совршена комбинација за после тренинг.
Потребните состојки се следниве:
- 600 гр лосос котлети
- 450 гр златна мешавина
- 50 мл маслиново масло
- 50 гр путер
- 1 лимон
- Морска сол
- Мелен црн бибер
Начин на подготовка:
Прелијте ги котлетите лосос со маслиново масло и сок од лимон, зачинете со сол и бибер и ставете ги во тавче со претходно загреан путер да се пржат. Завртете ги од другата страна и потоа пржете уште 5 минути, во зависност од дебелината на котлетите. Потоа котлетите ставете ги во рерна да се печат уште 15-на минути.
Во меѓувреме ставете го зеленчукот во зовриена вода (посолена) 10-на минути за да се свари. Кога зеленчукот е готов, исцедете го и попржете го во маслиново масло. Послужете ги котлетите со мешаниот зеленчук.
3. Зелена Салата со Јајца
Како протеински состојки, јајцата се задолжителен дел од фитнес исхраната и оброците после тренинг, а и пред тренинг. Добрата страна е што можете да ги конзумирате во било кое време од денот, не мора да ги приготвите само изутрина, дозволете си да уживате во вкусна салата за вечера или предјадење.
Потребните состојки се следниве:
- 1 зелено јаболко
- 1 свежа краставица
- 1 марула
- 1 кромид
- 20 гр пченка
- 100 гр кашкавал кравји
- 3 варени јајца
- 4 парчиња тост леб
За прелив:
- 2 лажици маслиново масло Borsh
- ½ лажиче сол
- ½ лажиче мелен бибер
- 1 лажиче сенф
- Сок од половина лимон
Начин на подготовка:
Ставете ги во еден сад маслото, солта, биберот, сенфот и лимоновиот сок, промешајте и оставете ги на страна. Сварете ја пченката, исцедете и измијте ја со ладна вода. Во сад за сервирање наизменично ставајте го исечканиот кромид, сечканото јаболко и краставица, парчињата варени јајца, кашкавалот сечкан на коцки, варената пченка и ситно сечканата марула. Прелијте со приготвената маринада. Постапката повторете ја уште еднаш. Остатокот од маринадата прелијте го одозгора. Сервирајте со потпечено тост лепче.
4. Фиш Бургер
Иако нема пишано правило дека бургерите се конзумираат само за ручек, овој вид на бургер е вистинскиот за таа намена. Од сите споменати оброци после тренинг, овој е навистина обилен и би било подобро доколку се конзумира за ручек, наместо за вечера неколку часа пред спиење.
Потребните состојки се следниве:
- 400 гр филети ослич
- ¼ лажиче црн бибер
- ½ лук во прав
- 1 лажица брашно
- 1 лажичка црвен пипер
- 2 лажички соја сос
- ¼ лажиче босилек
- 4 лажици маслиново масло
- 100 мл мајонез
- Марула или рукола
- 1 домат
- 1 парче кромид
- 4 лепчиња за бургер
Начин на подготовка:
Одмрзнете ги филетите од ослиќ и исушете ги со кујнска хартија. Потоа исечкајте ги на парченца и ставете ги во блендер. Додајте сол , бибер и луук во прав. Додајте го брашното, црвениот пипер, соја сосот, рузмаринот и блендирајте. Откако ќе ја изблендирате рибата префрлете ја во сад за матење.
Ставете маслиново масло и мешајте додека смесата не престане да се лепи на прсти. Треба да мешате минимум 10 минути. Најдобро е смесата за плескавици да одстои 24 часа на температура од 10 до 12 °C. Формирајте ги плескавиците и пржете ги во маслиново масло. За формирање на сендвичот на долниот дел од лепчето нанесете го мајонезот, доматот, малку кромид, па плескавицарта од риба, рукола, мајонез и лепче.
5. Смути со Јагоди и Банана
Смутито може да го конзумирате и како пијалок и како оброк. Како оброк, во него може да додадете и други видови на овошје по ваш вкус, а како пијалок може да го конзумирате со овошна салата или пак со посни бомбици од нашиот прилог со рецепти.
Потребните состојки се следниве:
- 0,5 литри млеко
- 300 гр јагоди замрзнати
- 2 банани
- 80 гр млечно чоколадо
- 2 лажици мед
- 1 чаша мраз
Начин на подготовка:
Ставете ги во блендер јагодите, бананите исечкани на парчиња и чоколадото искршено на коцки. Потоа додајте го млекото, медот и мразот и блендирајте. По блендирањето, смесата може да ја ставите во декоративни чаши и да уживате во еден од здравите оброци после тренинг.
Заклучок
Внесување на протеини во оброци после тренинг е добар начин да ја вратите изгубената енергија. Доколку чувствувате дека не можете да јадете 45 минути после тренинг, можете да јадете и после тоа, се дури не биде повеќе од 2 часа.
