Сите сакаме убав исончан тен на кожата во текот на летниот период, но сончањето може видно да ја оштети вашата кожа. Луѓето често сакаат да знаат како брзо да добијат исончан тен на кожата, без да ја оштетат. Во таа насока треба да се разгледаат неколку аспекти на овој процес, за да можеме подобро и полесно да ги избегнеме изгорениците, а сепак да добиеме исончан тен на кожата која го очекуваме после сончање.
Прашањето е дали сончањето е здраво?
Изложувањето на сонце значи и ризикување да се добие карцином на кожа или предвремено стареење на кожата. Голем дел на здравствени организации повикуваат истото да се избегнува, односно воопшто не препорачуваат подолга изложеност на сонце. Но, бидејќи тоа не е можно, важно е да се преземат мерки на претпазливост во моменти кога сме изложени на интензивна сончева светлина.
Сепак, ако сте внимателни и применувате средства за заштитата на кожата, ќе имате повеќе придобивки од умереното изложување на сонце. На пример, сонцето му помага на телото да процесира витамин Д, кој е неопходен за здрави коски, коса и заби.
Голем број на студии покажуваат дека изложеноста на сонце помага во зајакнување на нивото на серотонин во организмот. Ова значи дека сончањето позитивно влијае на расположението.
Што е најактуелно и како да добиете исончан тен без притоа да ја оштетите вашата кожа?
- Прво, избегнувајте солариуми. Овие помагала се дизајнирани да обезбедат интензивно изложување на УВ зраците, што ќе предизвикаат темен исончан тен, но предизвикуваат значително оштетување на кожата. Тоа може да доведе до рак на кожата и предвремено стареење.
- Одберете ја вистинската крема за сончање. Обрнете внимание на рејтингот на SPF и побарајте производ што содржи заштита од широк спектар. Обидете се да најдете крема за сончање со UVB заштита. SPF 30 или повисок фактор е адекватен, бидејќи блокира до 97% од штетните УВ зраци. Кремите со SPF 50 филтрираат до 98%. Здравствените дерматолошки организации предлагаат да се нанесува крема за сончање 15 до 30 минути пред да излезете надвор и повторно на секои два часа. Оваа фреквенција може да варира во зависност од вашата активност.
- Производите за заштита од сонце што се продаваат во маркетите може да содржат хемиски или минерални филтри. Во поново време се многу актуелни минералните или не-нано заштитни филтри, особено препорачливи за детската кожа. Хемиските филтри ги апсорбираат УВ зраците, и потоа таа енергија ја ослободуваат како термално зрачење кое создава чувство на топлина. Минералните филтри се најчесто аноргански минерални пигменти и тие ги рефлектираат, одбиваат УВ-зраците, не дозволувајќи им да навлезат во детската кожа.
- Доколку пливате или правите активност од која се потите, треба почесто да нанесувате крема за сончање, за да спречите изгореници. Обрнете посебно внимание на областите кои имаат помалку дневно изложување и можат да бидат почувствителни на горење.
- Ако сте надвор подолг период, обидете се да барате сенка од време на време или да носите облека што ќе ја заштити вашата кожа од преголема изложеност. Запомнете, дури и да имате капа, сепак можете да изгорите на лицето, ушите и вратот. Горењето на кожата може да биде поинтензивно ако сте близу вода што ќе го рефлектира сонцето.
Заклучок
UVB зраците се одговорни за изгорениците од сонце. Ова горење е првенствено ограничено на површинските слоеви на кожата. Изложеноста на овој вид на УВ зрачење придонесува за сончање, предвремено стареење и можност за развој на рак на кожата. Од витално значење е да ја заштитите кожата секогаш кога сте надвор подолго време и да користите средства за заштита.
По можност треба да се избегнуваат термините од 11h претпладне до 16h попладне. Во овој период е забележано најсилно штетно зрачење на сонцето. За да ја одбраните вашата кожа од штетните ефекти на сонцето, секогаш носете крем за сончање со широк спектар на заштитен фактор. Пожелно е и обичните креми за лице или лосиони за тело кои постојано ги користите во летниот период, да се исто така со делумен заштитен фактор. Ова ќе ви овозможи да го поминувате времето на отворено, спречувајќи поголеми оштетување на кожата и добивање на посакуваниот исончан тен.
