Летото и високите температури се тука. Не ни преостанува ништо друго освен да правиме планови за летениот одмор и да се разладуваме со вкусен домашен сладолед. Без разлика дали сте љубител на обичниот ванила вкус или претпочитате мешавини од вкусови, има една работа за која веројатно сите можеме да се согласиме – ништо не може да го победи домашниот сладолед. Овде ќе посочиме некои од нашите најомилени рецепти. Сè што треба да направите е да одберете кој прв да го направите.
Домашен сладолед од ванила
Овој навидум најобичен вкус на сладолед, може да биде одличен, бидејќи може да го украсите со најразлични додатоци и да добиете безброј комбинации.
Состојки:
-
- Млеко – 250 ml
- Слатка павлака – 250 ml
- Жолчки од јајца – 5 пар
- Шеќер – 125 g
- Стапче ванила – може да се стави ванилин шеќер, по желба
Подготовка:
Млекото, слатката павлака и ванилата се ставаат во тенџере и се варат на средна температура додека не зоврие. Потоа се става на страна 10 минути додека не се излади.
Во сад за матење се миксираат жолчките и шеќерот, додека смесата не побели. Им се додава смесата од млеко и слатка павлака.
Целата смеса се враќа на ринглата и се загрева додека не се појават меурчиња.
Смесата се става во калап за сладолед или кутија и штом се излади, може да се стави во замрзнувач.
За декорација може да додавате разно црвено овошје, јаткасти плодови, парчиња чоколадо, цимет и др.
Домашен сладолед од јагоди
Овој сладолед со сигурност ќе биде еден од најубавите сладоледи од јагода кои ги имате пробано. Особено за децата кои го обажаваат овој вкус на сладолед.
Состојки:
-
- Кисело млеко – 200 ml
- Слатка павлака – 200 ml
- Шеќер – 200 g
- Јагоди – 200 g
Подготовка:
Најпрво убаво измијте ги јагодите и измиксирајте ги во блендер за да добиете изедначена смеса како пире. Постепено додавајте го шеќерот и киселата павлака и измешајте.
Измиксирајте ја слатката павлака околу 3-5 минути, додадете ја смесата со јагоди и убаво измешајте.
Смесата се става во калап за сладолед или кутија и може веднаш да се стави во замрзнувач.
За декорација може да додавате разно црвено овошје или шарени трошки.
Чоколаден домашен сладолед
Замена за љубителите на чоколадо во летниот период е токму овој неодолив сладолед.
Состојки:
-
- Млеко – 250 ml
- Слатка павлака – 500 ml
- Шеќер – 170 g
- Темно чоколадо – 140 g
- Какао – 3 лажици
- Жолчки од јајца – 5 пар
- Стапче ванила – може да се стави ванилин шеќер, по желба
- Сол – прстофат
Подготовка:
Во тенџере ставете половина од слатката павлака и какаото со постојано мешање, додека да зоврие смесата. Тргнете го на страна и додадете го чоколадото и мешајте додека да се стопи. Потоа додадете ја останатата павлака.
Ставете ја смесата во голем сад и поставете цедалка над него.
Жолчките измешајте ги во друг сад и тргнете ги настрана.
Во трет сад загрејте ги млекото со ванилата, шеќерот и солта, без да зовријат. Оваа смеса додадете ја во садот со жолчките и мешајте. Ставете ги на ниска температура и продолжете со мешање. Ваквата смеса додадете ја во цедалката и откако ќе се исцеди, убаво мешајте додека да се изедначи смесата. Смесата ставете ја во фрижидер да стои 8 часа. Потоа ставете ја во блендер додека не згусне и може да се стави во замрзнувач.
Декорирајте по желба.
Здрав домашен сладолед со вкус на банана и путер од кикирики
Доколку внимавате на вашата линија, секогаш може да направите и здрава нискокалорична варијанта на вашиот омилен сладолед. Во продолжение еден таков предлог, но по желба можете да направите и различни варијации на истиот по ваша желба.
Состојки:
-
- Излупени замрзнати банани, исечкани на парчиња – 4 пар
- Цимет – 1 лажичка
- Млеко од бадеми – 2 лажици
- Путер од кикирики – 1 лажичка
- Темно чоколадо изрендано – 1 лажичка
- Кршени бадеми – 1 лажичка
Подготовка:
Во блендер ставете ги замрзнатите банани заедно со млекото од бадеми. Откако ќе се изблендираат се додава путерот од кикиритки и циметот и повторно се блендира.
Ставете ја смесата во замрзнувач.
Декорирајте го сладоледот со парчињата рендана чоколада и кршени бадеми.
Се надеваме дека ви се допаднаа нашите предлози и дека ќе пробате барем еден од нив. Уживајте во летото и редовно разладувајте се со вкусен домашен сладолед.
За повеќе идеи за други летни десерти можете да го разгледате и нашиот прилог со рецепти.
