Добрата страна на готвењето во вашата кујна е што можете да направите рецепти по ваша желба. Имате целосна слобода да додавате состојки и да пробате нов начин на подготовка на домашни кифлички. Пред секоја подготовка е потребна и мала инспирација, за што може да ви послужи прилогот со рецепти на Рептил. Тоа што е уште подобро е можноста да уживате во нивниот вкус додека сеуште се топли.
Кифлички хот дог
Хот дог се смета за доста популарен сендвич и кај нас, не само во Америка, но домашни кифлички се одлична замена за хот дог од продавница. Убавината во тоа е што може да додадете сос каков што вие сакате.
Потребните состојки се следниве:
- 500 гр брашно
- 500 гр пилешки виршли
- 1 пакетче сув квасец
- 250 мл јогурт
- Малку шеќер
- 1 лажичка сол
- 1 јајце
- 5 лажици масло
- 100 мл топла вода
- Сусам
- 1 жолчка од јајце
Начин на подготовка:
Сувиот квасец, топлата вода и шеќерот промешајте ги и почекајте да се активира квасецот, а потоа додадете ги останатите состојки, замесете меко тесто и оставете го да стаса на топло место.
Стасаното тесто расукајте го во правоаголник и пресечете го на 6 долги ленти, а потоа во секоја лента завиткајте по една виршла и така подготвени наредете ги на тавче за печење.
Кифлите покријте ги со крпа и почекајте околу 15 минути, потоа премачкајте ги со изматената жолчка и одозгора посипете ги со сусам. Виршлите во тесто печете ги на 200 степени околу 20 минути.
Полнети кифлички
Домашни кифлички може да се направат на разни начини со различни состојки за да добиете нови вкусови на прилично лесен начин. Само измешајте ги заедно и ставете ги во рерна. За 20 минути ќе добиете вкусни домашни кифлички.
Потребните состојки се следниве:
- 1 кг брашно
- 200 мл масло
- 500 мл млеко
- Квасец
- 300 гр кашкавал
- 300 гр шунка
- 200 мл кечап
- Оригано
- Јајце
- Сусам
Начин на подготовка:
Квасецот ставете го да стаса со малку млеко, сол и шеќер. Во длабок сад ставете го брашното, додајте го стасаниот квасец и со маслото и млекото замесете тесто. Кога ќе стаса тестото, расукајте кора на набрашнета површина.
Кората премачкајте ја со кечап, одозгора ставете рендана шунка, рендан кашкавал и оригано. Исечете триаголници и завиткајте ги кифлите. Ставете ги во плех обложен со хартија, премачкајте ги со изматено јајце и наросете сусам. Печете ги во загреана рерна околу 20 минути.
Домашни соленки
Домашни кифлички може да се направат во повеќе форми. На пример, за овој вид на соленки може да употребите калап за формирање на различни фигури што може да биде и забава за најмладите членови на семејството.
Потребните состојки се следниве:
- 500 гр брашно
- 200 гр пченкарно брашно
- 1 пециво
- 200 гр путер
- 250 гр сирење
- 150 гр кулен
- 250 гр цврст јогурт
- За премачкување: 2 јајца и сусам
Начин на подготовка:
Во длабок сад измешајте ги брашната и пецивото, додајте го омекнатиот путер и сол по желба (1 до 2 лажички). Потоа замесете тесто додавајќи ги останатите состојки. Кога добро ќе го измесите тестото, покријте го садот со фолија и ставете го во фрижидер да отстои околу 1 час.
Кога ќе се олади тестото, расукајте кора со дебелина по ваша желба и со калап за модли исечете го тестото. Извадените форми од тесто ставете ги во плех за печење, обложен со хартија. Соленките премачкајте ги со претходно разматеното јајце и посипете сусам. Печете ги во загреана рерна околу 15 минути.
Мини пица ролнички
Кифличките не секогаш мора да бидат подготвени на стариот или ист начин. Како инспирација, може да ви послужат мини пица кифлички во кои ќе ужива целото семејство. Доколку сакате да пробате друг, поразличен вкус, посетете ја онлајн продавницата на Рептил.
Потребните состојки се следниве:
- 250 гр шунка
- 250 гр сирење кравјо
- 100 гр масло
- 300 гр кисела павлака
- 150 гр кечап
- 1 квасец
- 1 лажичка шеќер
- 100 мл вода
- 600 гр брашно
- 2 јајца
Начин на подготовка:
Квасецот растопете го во водата со малку шеќер. Во брашното додајте го маслото, киселата павлака и јајцата. Замесето меко тесто. Оставете го да отстои барем еден час на топло. Потоа што потенко исукајте кора, премачкајте ја со кечап и посипете со оригано.
Наредете ја шунката исечена на листови. Потоа изрендајте го сирењето, па завиткајте го тестото во ролат и од едната и од другата страна, така што ќе добиете две ролни. Сечете парчиња, наредете ги на плех и испечете ги на 200 степени додека да добијат убава црвена боја.
Соленки со кашкавал
Соленките со сирење или кашкавал се едни од најтрадиционалните видови на домашни кифлички, а се навистина вкусни. Почекајте 10 минути малку да се оладат пред да ги конзумирате, но да бидат доволно топли за да уживате во растопениот кашкавал. Добар апетит!
Потребните состојки се следниве:
- 4 јајца
- 1 чаша вода
- 1 чаша масло
- 300 гр кашкавал
- 5 чаши брашно
- 1 пециво
- Сол
- Сусам
- 1 јајце
Начин на подготовка:
Во длабок сад ставете го брашното, претходно изренданиот кашкавал, јајцата, водата, маслото, солта, пецивото и добро промешајте. Замесете тесто од сите состојки. Расукајте кора со дебелина по ваша желба. Кората премачкајте ја со изматено јајце и одозгора наросете сусам. Сечете форми по ваша желба и наредете ги во плех обложен со хартија. Потоа ставете да се пече во загреана рерна околу 20 минути додека добијат убава боја.
Заклучок
За да направите вкусни домашни кифлички не ви треба многу време, а ни состојки. Ви треба само идеја и рерна за да се испечат. На каков начин и да ги подготвите, тие се одличен прилог за семеен ручек, празник или слава. Уживајте!
